HAWWA KI BETI KI AWAZ…

Baba ap ne ye hi kaha tha
Jab bhi tum dar jao guriya
Zor se mujh ko awaz lagana
Neend agar na aye tum ko
Cheekh k mujh ko phir se bulana
Bhai agar thora bhi dantay
Kehna baba atay hon ge
Baba maine yehi kiya tha
Zor se cheekhi
Awaz lagai
Cheekh k un sab ko bhi bola
Baba dekho atay hon ge
Phir na tum ko choren ge
Hath mere tum choro ab
Baba tum ko maren ge
Lekin baba…
Ap na aye
Bhai na aya
Koi na aya
Khoon bhi nikla
Maar bhi khai
Lekin us zalim ko baba
Mujh per zara bhi tars na aya
Dekhen baba ap ki Zainab
Khoon me lutput, khamosh pari hai
Puch rahi hai logon se
Aay is mulk k rehne walon 
Khud ko Muslim kehne walon
Ye Hawa ki beti kab tak
Hawas ki younhi bhent charhegi?
Kachre k dheron per milegi?
Kab tak younhi soug rahega?
Kab tak beti bojh rahegi?